Tuesday, August 3, 2010

मायाजालमा बन्दी शब्दहरु-२७
बज्यूको दन्तेकथा
लामो अवधिपछि यसपालीको याम
पर्खेरै बसेको छु दन्तेकथा
अगेनु वरिपरि झुम्म बसेर
एकहूल केटाकेटीहरूको निद्रा पनि
अभिलाषा साँचेर जागै छन
'बज्यूको मुखारबिन्दबाट सुन्छौं रमाइलो दन्तेकथा!'

गुन्द्रीमा बसिरहेकी बज्यू
एकाएक कहाँ हराएकी थिई यतिञ्जेलसम्म?
उत्तरहरू होइनन तर यो दन्तेकथाको
पिँधिराखेर जाँतोमा एक पाथी मकै
कुटिराखेर ढिकीमा एक धार्नी धान
क्षितिज़ नै काटिसकेकी रहिछे बिचरी बज्यूले!

भन्छिन बज्यू हाँस्दै मरीमरी-
"मर्नै भयो सर्केर बाजेलाई
मेलोमा सातु खाँदा
ठेला उठेको हातले आफ्नै गाला मुसारेर
पुर्लुक्कै कान्लामा पल्टिँदा
झुल्किन आएको अजिङ्गरजस्तो सपना
एकछिनको झमक्क निद्राभित्रै
भागेछ पल्लै डाँड़ा काटेर बाजेको सपनाले।"

मेरी बज्यू-
मेरो सपनामा पो आउँछिन सधैं
लामो समयपछि माइतबाट फर्केकी दुलहीझैं
हातमा एक ठेकी दही

एक पोको चिउरा बोकेर
थचक्क पिँढ़ीमा बस्दै दन्तेकथा पस्कन्छु भन्छे
अगेनु वरिपरि बसेका केटाकेटीलाई।

No comments:

Post a Comment