Tuesday, August 3, 2010

मायाजालमा बन्दी शब्दहरु-२९
कविता क्रमश: कविता-१
पर्खाल रहेछ अजङ्गको
कविताको बाटोमा
पुग्न सकिएन सजिलै।
०००
सपक्कै बाटेकी छे शकुन्तलाले
कविताको चुल्ठो
बलात्कारको सिउँदोमा।
०००
झ्याल उदाङ्गै राखेछन
रातभरि कविले
जूनको शीतल पहिरनसितै-
कविताको प्रतीक्षामा।
०००
भोको पेटमा
गुन्दुकको झोलको स्वाद
कविताले मनग्गे पस्कियो।
०००
हत्याराको पापी हातमा लागेको
मैला रगत
पुछिएन कविताको तौलियाले।
०००
बिमारी छोरीले मागेकी छे
हर्लिक्सको बोतल
झोलामा सुटुक्कै पसेछ-
कविताको धुस्रे अनुहार।
०००
प्रिये नरिसाऊ!
तिमीसम्म पुग्ने बाटो
झ्वाम्मै छोपेको छ-
कविताको लहराले।
०००
ग्वाम्लाङ्गै ओड़ेको छु
कविताको धुसा
माघको ठिहीमा-
जिन्दगीको।
०००
जिप्टिएको छ सौन्दर्य तिम्रो
कविताका नङहरूमा
शब्दको `नेल-पालिस' भएर।
०००
आवेदन आयो
मेरो टेबलमा- कविताको
`होलीडे-ड्यूटी' नगर्ने रे!
०००
डढ़ेलो लागेछ दिउँसै
कविताको जङ्गलमा
अनावृष्टिले।
०००

No comments:

Post a Comment