Wednesday, August 5, 2009

तीखे साँडहरू


असारको हिले गराले

तिम्रो पाखुरे वैंसलाई

झिमिक्कै आँखा झिम्क्याएर

सुटुक्कै वीर्यको माग गर्छे

अनि

स्खलित तिम्रो शरीर सुम्सुम्याएर

सुकुमारी सपना गर्भधारण गर्छे

औंला भाँचेर दिन गन्ती गर्दै

दश महिना नपुग्दै तिम्रो काखमा

थपक्कै जून राखिदिन्छे


वैरीको बिरालो आँखा तिमीले देखेको छौ?

यामको आङ छाम्न नजान्ने

सिंगाबिनाका साँड़झैं डुक्रिरहन्छन

चैतको उखरमाउलो घामलाई पनि

असारको पन्ध्र मानेर

खेत जोतिरहने साँडहरू

तरतर पसीना चुहाउँछन

र खरीबिनाको मादल बजाउँदै

गुहार माग्दै हिड़्छन

कम्मरमा रित्तो गाग्री बोकेर

पँधेरो धाउन आँटेकी नकच्चरीलाई



रजाइँ छ साँड़हरुको

चैतको बाँझो खेतमाथि

के तिमी जुधाउन सक्छौ

सिंग नभएका साँडहरूसित

आफ्नो सिंग?

काखमा खेलिरहेकी जूनलाई

जोगाऊ है तिमी

सिंग नभएका साँडहरूसित

बाली जोगाउन

चर्को पो छ है!